धाराखबर समाचारदाता
पोखरा,२७ चैत । “सुन्दर ठाउँ हेमजा जाउँ, आलुका स्वादिष्ट परिकार खाउँ, आलु एक परिकार अनेक” भन्ने नाराका साथ पोखरा–२५ को हेम्जामा राष्ट्रिय हेम्जा आलु महोत्सव सुरु भएको छ ।
यही चैत २७ गतेदेखि वैशाख ५ गतेसम्म संचालन हुने उक्त आलु महोत्सवको आज (शुक्रबार) पोखरा महानगरपालिकाका प्रमुख धनराज आचार्यले उद्घाटन गर्नुभएको हो । १४ औं संस्करणको उक्त महोत्सव स्थानीय विष्णुपादुका क्लवले आयोजना गरेको हो ।
प्रमुख आचार्यले कृषि उपजका नाममा महोत्सव हुनु आफैमा महत्वपूर्ण भएको उल्लेख गर्दै आलु महोत्सवले समग्र पोखरालाई नै ब्राण्डिङ गर्न सफल भएको बताउनुभयो ।
आलु महोत्सवलाई प्राथमिकता दिँदै महानगरले उक्त महोत्सव कार्यक्रमलाई रातो कितावमा समेटिएको सुनाउँदै प्रमुख आचार्यले हेम्जाको आलु सबै पोखरेलीले मन पराउने गरेको बताउनुभयो । साथै आचार्यले हेम्जामा व्यवसायिक कृषिका लागि महानगरले बजेट विनियोजन गर्दै आएको र अबका वर्षमा त्यसलाई वृद्धि गरिने आश्वासन दिनुभयो ।
पोखरा महानगरपालिका प्रवक्ता एवं वडा नं २५ का वडाध्यक्ष मोतिलाल तिम्सिनाले महानगर किसानको पक्षमा रहेको बताउँदै आलु महोत्सव हेमजावासीको चाड भएको उल्लेख गर्नुभयो । पोखरा महानगरपालिकाका प्रमुख प्रशासकीय अधिकृत मुक्तिराम अर्यालले महोत्सवले कृषिमा आत्मनिर्भर हुनुपर्ने संदेश दिएको उल्लेख गर्दै महानगर कृषि, पर्यटन तथा व्यापार मार्फत स्थानीयको जीवनस्तर उठाउन लागि परेको भनाइ राख्नुभयो ।
मूल समारोह समितिका अध्यक्ष वसन्तकुमार श्रेष्ठले सरोकारवालाको साथ सहयोगमा आलु महोत्सवलाई निरन्तरता दिन पाएकोमा खुशी व्यक्त गर्दै महोत्सव मार्फत पोखरामा कृषि पर्यटक बृद्धि हुने अपेक्षा व्यक्त गर्नुभयो। महोत्सव सुरु हुनुपूर्व हेमजास्थित विष्णुपादुका माईस्थानबाट बाजागाजासहित कृषि झाँकी र्याली निकालिएको थियो ।
महोत्सव अन्तर्गत आलु तथा ताजा तरकारीको बृहत प्रदर्शन, आलुको पहाड निर्माण, आलुका विभिन्न परिकार, कृषकका लागि माटो, वोट विरुवा, परीक्षण तथा रोग निधान, कृषक र कृषि सम्बन्धी विविध सांस्कृतिक कार्यक्रम रहने बताइएको छ ।
महोत्सवमा आलुको परिकारको एउटा स्टल, ३० वटा कृषि स्टल तथा अन्य सय वटा व्यापारिक स्टल छन् । महोत्सव प्रवेशका लागि साधारणतर्फ रु.१ सय रुपैयाँ तथा विद्यार्थीलाई परिचयपत्रका आधारमा ५० रुपैयाँमा टिकटको व्यवस्था गरिएको जनाइएको छ । महोत्सव स्थलमा प्रतिकेजी आलुको मूल्य रु ३५ रुपैयाँ कायम गरिएको छ ।
