पोखरा, १०माघ । पोखरा–२९ को भण्डारढिकस्थित लेखनाथ रङ्गशालामा शुक्रबारदेखि संचालित २६औं संस्करणको आदर्श कप फुटवल प्रतियोगिता अन्तरगत आज (शनिबार) सम्पन्न फुटवल प्रतियोगितामा स्याङ्जा जिल्लाको होराइजन क्लव अघिल्लो चरणमा प्रवेश गरेको छ ।

आयोजक समुह आदर्श क्लवलाई १–० को अन्तरले पछि पार्दै होराइजन क्लव अघिल्लो चरणमा प्रवेश गरेको हो । होराइजन क्लव जर्सी नं १७ का खेलाडी विश्व थापाले खेलको ८१ औ मिनेटमा गरेको गोल नै खेलको निर्णायक गोलको रुपमा परिणत भएको थियो । शनिवारको खेलमा होराइजन क्लव जर्सी नं १७ का खेलाडी विश्व थापा म्यान अफ दि म्याच बन्न सफल भएका छन् ।

पोखरा–२९ स्थित आदर्श युवा क्लवको आयोजनामा माघ ९ गतेदेखि १६ गतेसम्म हुने प्रतियोगितामा गण्डकीका विभिागीयसहित ८ समुहले सहभागिता जनाएका छन् । भोलि आइतवार पर्वतको गन्नी एफसी र तनहँु जिल्ला फुटबल संघको समुहबीच प्रतिस्पर्धा हुने जानकारी आयोजक संस्थाले दिएको छ ।

फुटवल खेलाडीको स्तर एवं मनोवल वृद्धिका साथै खेल पर्यटनको विकास गर्नका लागि आयोजना गरिएको उक्त प्रतियोगितामा प्रथम पुरस्कार रु ४ लाख ९९ हजार ९ सय ९९ रहेको जानकारी उक्त क्लवका अध्यक्ष एवं प्रतियोगिताका संयोजक पदम गुरुङले दिनुभयो ।

त्यस्तै द्धितीय हुने समुहले रु ३ लाख ३३ हजार ३ सय ३३ रुपैयाँ प्राप्त गर्ने छन् भने उत्कृष्ट खेलाडीलाई पच्चीस हजार रुपैयाँका साथै उच्च गोलकर्ता, उत्कृष्ट प्लेमेकर, उत्कृष्ट डिफेन्स, उत्कृष्ट गोलरक्षक र उत्कृष्ट कोचलाई पन्ध्रपन्ध्र हजार रुपैयाँले पुरस्कृत गरिने बताइएको छ ।

त्यस्तै प्रत्येक गोलको म्यान अफ दि म्याच घोषित खेलाडीलाई पाँच हजार रुपैयाँद्धारा पुरस्कृत गरिने उक्त प्रतियोगिता सम्पन्न गर्न ६१ लाख रुपैयाँ खर्च लाग्ने बताइएको छ ।